پۆلیسی سلێمانی دەستگیرکردنی سێ تۆمەتباری لە ناحیەی سیتەک راگەیاند کە هەستابوون بە دزینی کێبڵ و مۆلیدەی کارەبا.
بەڕێوەبەرایەتیی پۆلیسی پارێزگای سلێمانی بڵاویکردەوە، “دوای تۆماركردنی چەند سكاڵایەك لەلایەن هاوڵاتییانەوە كە دزییان لێكرابوو، هێزەكانی پۆلیس لێكۆڵینەوە و بەدواداچوونەكانیان بۆ دۆزینەوە و دەستگیركردنی تۆمەتباران دەستپێكرد و دوای وەرگرتنی بڕیاری دادوەر، توانرا لەلایەن بنكەی پۆلیسی سیتەكەوە بەهاوكاری یاریدەدەرێتی ئاسایشی سیتەك سێ تۆمەتبار دەستگیربكرێن”.
ئاشکراشیکرد، “لەئێستادا هەریەك لە تۆمەتباران (س، م، م)،(ع، ك، م)،(ر، س، غ) بە بڕیاری دادوەر و بەپێی ماددەی 443 لە یاسای سزادانی عیراقی راگیراون و لێكۆڵینەوە لەگەڵیاندا بەردەوامە”.
ئاماژەی بەوەشکرد، “لە كاتی دەستگیركردنی تۆمەتبارەكاندا دەستگیراوە بەسەر ئۆتۆمبێلێكدا كە بە تۆمەتباران بووە”.
