وەزارتی بازرگانیی عێراق، وادەی دابەشكردنی بەشەخۆراكی تایبەت بە مانگی “رەمەزان” و پێكهاتەكانی ئاشكراكرد و چەند خۆراكێك بۆ پێكهاتەكانی زیادكراون.
بەپێی لێدوانی كاربەدەستانی وەزارەتی بازرگانیی عێراق، رۆژی 18ـی ئەم مانگە، بەشەخۆراكی مانگی “رەمەزان” دەدرێت بە بریكارەكانی خۆراك و راستەوخۆ دەست بە دابەشكردنی بەسەر هاوڵاتییاندا دەكرێت.
جاسم عامری یاریدەدەری بەڕێوەبەری كۆمپانیای گشتیی بازرگانیی خۆراك لە وەزارەتی بازرگانی رایگەیاند، پێكهاتەكانی بەشەخۆراكی مانگی “رەمەزان” سەرباری ئەو جۆرانەی كە مانگەكانی پێشتر دابەشكراون، بۆ هەر خێزانێك تەبەقێك هێلكە، پێنج كیلۆگرام ئاردی سفر، نیو كیلۆگرام ئاردی گەنمەشامی و یەك كیلۆ شەعرییە دیاریكراون.
بەشەخۆراكی تایبەت بە مانگی رەمەزان هاوڵاتییانی هەرێمیش دەگرێتەوە و یاریدەدەری بەڕێوەبەری كۆمپانیای گشتیی بازرگانیی خۆراك لە وەزارەتی بازرگانی دەڵێت، “ئەم بەشەخۆراكە بەسەر 41 ملیۆن و 300 هەزار هاوڵاتیدا دابەشدەكرێت و تەنها بۆ مانگی رەمەزانە”.
