سەرۆك وەزیرانی عێراق لە بەغداد لەگەڵ رێكخەری كۆشكی سپی بۆ كاروباری رۆژهەڵاتی ناوەڕاست و باكووری ئەفریقا كۆبووەوە.
محەمەد شیاع سودانی، سەرۆك وەزیرانی عێراق پێشوازی لە برێت مەكگۆرك، رێكخەری كۆشكی سپی بۆ كاروباری رۆژهەڵاتی ناوەڕاست و باكووری ئەفریقا و نێردەی جۆ بایدن سەرۆكی ئەمریكا كرد.
نوسینگەی سەرۆك وەزیران بڵاویكردەوە، لە دیدارەكەدا پەیوەندییەكانی عێراق و ویلایەتە یەكگرتووەكان تاووتوێكرا، لەگەڵ شێوازی پەرەپێدان و بەرەوپێشەوەبردنی لە سەرجەم بوارەكاندا كە ببێتەهۆی خزمەتكردنی بەرژەوەندییەكانی گەلانی عێراق و ئەمریكا.
سودانی جەختیكردەوە لەسەر توانای هێزە ئەمنییەكان لە رووبەڕووبوونەوەی تیرۆر و چەسپاندنی سەقامگیری.
لای خۆیەوە مەكگۆرك بەپێی راگەیەندراوەكە پاڵپشتیی وڵاتەكەی بۆ سەركەوتنی حكومەتی ئێستا نیشاندا، لەگەڵ بەردەوامی ویلایەتە یەكگرتووەكان بۆ پێشكەشكردنی راوێژ بە هێزە عێراقییەكان، پابەندی وڵاتەكەشی بە رێككەوتنی چێوەی ستراتیژی و پاڵپشتیكردنی چاكسازییە حكومییەكان لە بوارەكانی وزە و ژێرخان و رووبەڕووبوونەوەی گۆڕانكارییەكانی ئاووهەوا نیشاندا.
