قوباد تاڵەبانی جێگری سەرۆك وەزیران، لەگەڵ ئەنتۆنیۆ گۆتێرێس، سكرتێری گشتیی نەتەوە یەكگرتووەكان كۆبووەوە و تاوتوێی دواپێشهات و گۆڕانكارییە سیاسییەكانیان كرد.
لە كۆبوونەوەكەدا كە ئەمڕۆ 2ی 3 لە شاری هەولێر بەڕێوەچوو، جێنین پلاسخارت نوێنەری تایبەتی سكرتێری گشتیی نەتەوەیەكگرتووەكان و دابان شەدەڵە جێگری سەرۆكی فەرمانگەی پەیوەندییەكانی دەرەوە ئامادەیبوون، تیشكخرایە سەر كێشەكانی ناوخۆی هەرێم و عێراق و جەخت لە چارەسەركردنییان لەرێگای دیالۆگەوە كرایەوە.
لە سەرەتای كۆبوونەوەكەدا، گۆتێرێس باسی رۆڵ و گرنگی سەرۆك مام جەلالی كرد و وتی، “وەك هاوڕێیەكی دێرینی سەرۆك مام جەلال و دۆستی ئێوە، داوای وەلانانی كێشەكان و چارەسەركردنی گرفتەكانی ناوخۆی هەرێمی كوردستان دەكەم لەپێناو پاراستنی بەرژەوەندییەكانی هاوڵاتییانی هەرێمی كوردستان”.
دواتر باسی رەوشی عێراق و كێشەكانی نێوان هەولێر و بەغداد كرا جەختكرایەوە، پێویستە لەسەر بنەمای لێكتێگەیشتن و لەپێناو بەرژەوەندیی گەلانی عێراق بە شێوەیەكی بنەڕەتی كێشەكان چارەسەربكرێن.
قوباد تاڵەبانی بەوردیی گرفت و كێشە سیاسییەكانی هەرێمی كوردستانی بۆ روونكردەوە و دیدی خۆی لەبارەی چۆنییەتی چارەسەركردنی ئەو كێشانە خستەڕوو لەكۆتاییشدا، سوپاسی هاتنی گۆتێرێزی كرد و هەوڵ و پەرۆشی لە پێناو یەكڕیزی گەلی كورد و عێراق بەرز نرخاند.
