سەرۆکی دەستەی خاوەن پێداویستییە تایبەتەکانی عێراق رایگەیاند، رێوشوێنە هونەری و کارگێڕییەکانی دابەشکردنی مووچە بەسەر هاوەڵانی نەخۆشییە درێژخایەنەکان و خاوەن پێداویستییە تایبەتەکان تەواو بووە و لە ئایندەیەکی نزیکدا دابەشدەکرێت.
زکری عەبدولرەحیم سەرۆکی دەستەی خاوەن پێداویستییە تایبەتەکانی عێراق رایگەیاند، “دەستەکەمان رێوشوێنە دارایی و هونەری و کارگێڕییەکانی دابەشکردنی مووچە بەسەر هاوەڵی نەخۆشانی نەخۆشییە درێژخایەنەکان و خاوەن پێداویستییە تایبەتەکان تەواوکردووە، ئەمەش پاش ئەوەی جارێکی دیکە پشکنین و پێداچوونەوە بە بەڵگەکانیاندا کراوە”.
ئاماژەی بەوەش کرد، “لەسەر بودجەی 2022 بە بەهای سێ ملیار دینار، 12 هەزار هاوەڵی خاوەن پێداویستییە تایبەتییەکان سوودمەند دەبن لە وەرگرتنی مووچە”.
ئاشکراشیکرد، “سەبارەت بە مووچەی فەوتاوی ساڵانی رابردوو، دەبێت چاوەڕوانی پەسەندکردنی بودجەی ساڵی 2023 بکەین”.
