بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە رەییان كلدانی، ئەمینداری گشتیی بزوتنەوەی بابلیون كرد.
لە دیدارێكدا دوایین گۆڕانكارییە سیاسییەكانی عێراق و هەرێم تاوتوێكران و جەخت لە هەماهەنگی و كاری هاوبەش كرایەوە لەپێناو سەرخستنی پرۆسەی سیاسی لە وڵاتدا.
سەرۆك بافڵ جەلال تاڵەبانی ئاماژەی بە گرنگی و بەردەوامی گفتوگۆكان كرد لەپێناو چارەسەركردنی كێشەكان و كاركردن لەپێناو بوژاندنەوەی وڵات لە هەموو بوارە جیاوازەكان و وتی، “دەبێت دەستوور بنەمای چارەسەركردنی كێشەكان بێت و هەمووان بە ئاراستەی تێپەڕاندنی بەربەستەكان كار بكەین، بەرپرسیارێتیی نەتەوەیی و مێژوویی ئێمەیە ژیانێكی سەقامگیر بۆ هاوڵاتییانمان دەستەبەر بكەین.
سەبارەت بە پرسی هەڵبژاردن لە هەرێم و پاراستنی مافی پێكهاتەكان، هەردوولا هاوڕابوون هەموو پێكهاتەكان نوێنەرایەتیی راستەقینەی خۆیان بكەن و رێگانەدرێت هیچ لایەنێك لەجیاتی ئەوان بڕیاربدات”.
