لەسەر بەرزبوونەوەی زیاتری نرخی گۆشتی سوور لە بازاڕەكان و بە تایبەت لە مانگی رەمەزانی ئەمساڵ روونكردنەوە دەدرێت، ئەندامێكی لیژنەی نرخ و چاودێریی بازاڕ لە قائیمقامیەتی سلێمانی دەڵێت، ” لە مانگی رەمەزاندا نرخی شمەك و كاڵاكان دادەبەزن و هۆكارەكەی رووندەكاتەوە”.
هێرش محەمەد، ئەندامی لیژنەی نرخ و چاودێریی بازاڕ لە قائیمقامیەتی سلێمانی لە لێدوانێكدا بە تۆڕی میدیایی ئێستای راگەیاند، یەكێك لە هۆكارەكانی بەرزبوونەوەی نرخی گۆشتی سوور وەرزی زاوزێی ئاژەڵانە لەم وەرزەدا كە سەربڕین كەمدەبێتەوە و ساڵانە لەم كاتە نرخەكەی بەرزبوونەوە بەخۆوە دەبینێت و ئەمڕۆش نرخەكەی لە 18 هەزار دینارەوە بووە 20 هەزار دینار.
ئەندامەكەی لیژنەی نرخ و چاودێریی بازاڕ جەختیكردەوە، “نرخی یەك كیلۆ گۆشتی سوور ناگاتە 30 هەزار دینار و ئەوەی كە باسدەكرێت قسەی بازاڕە و بە پێچەوانەوە لە مانگی رەمەزاندا حكومەتی عێراق چەند ماددەیەكی خۆراكی بەسەر هاوڵاتییاندا دابەشدەكات و نرخەكەیان دابەزین بەخۆوە دەبینێت”.
