بەڕێوەبەری خوێندنی کوردی لە كەركوك، گەشتکردنی لە خوێندکاران قەدەغەکرد و دەڵێت، “تەنانەت لە رۆژانی هەینی و شەممەشدا کە پشوون”.
شێرزاد رەشید کاکە، بەڕێوەبەری خوێندنی کوردی لە پەروەردەی کەرکوک، کارگێڕیی هەموو خوێندنگەكانی خوێندنی کوردیی شارەكەی ئاگادارکردەوە کە هەموو جۆرە گەشتێک بۆ خوێندکاران بۆ دەرەوەی شاری کەرکوک قەدەغەیە و رێگەپێدراو نییە.
بەڕێوەبەری خوێندنی کوردی داوادەکات هیچ داواکارییەکیان بۆ وەرگرتنی رەزامەندی بۆ ئەنجامدانی گەشت بۆ خوێندكاران لەلایەن كارگێڕیی خوێندنگەكانەوە پێشكەشنەكرێت و جەختدەكاتەوە، لە كاتی ئەنجامدانی گەشتی دەرەوەی شاری خوێندكارانی هەر خوێندنگەیەكدا، رێوشوێنی یاسایی توند لە بەرامبەر کارگێڕیی ئەو خوێندنگەیەدا دەگرنەبەر.
شێرزاد رەشید کاکە، داوا لە دایکان و باوکانی خوێندکاران دەكات رێگەنەدەن هیچ گرووپ و رێکخراوێک لە دەرەوەی خوێندنگە یاخود لە رۆژانی هەینی و شەمماندا کە رۆژانی پشوون، گەشت بۆ منداڵەکانیان رێكبخەن و دەڵێت، “هەر رووداو و کارەساتێکی نەخوازراو رووبدات، ئێمە وەکو پەروەردەی خوێندنی کوردی لێی بەرپرسیارنین”.
