بە مەبەستی رێگریکردن لە بەقاچاخبردنی دۆلار و بەرزبوونەوەی نرخەکەی بانکی ناوەندی کۆمەڵێک بڕیاری نوێ دەدات و رێوشوێنەکان لە بازگە و خاڵە سنوورییەکان توندتر دەکاتەوە.
ئەمڕۆ هەینی عەلی عەلاق پارێزگاری بانکی ناوەندی لە کۆبوونەوەیەکیدا لەگەڵ ژمارەیەک بەرپرسی ئەمنی و بەڕێوەبەری بانکەکان رایگەیاند، “بانکی ناوەندی تەنها دەسەڵاتی چاودێریکردنی سەراف و بانکەکان و پشکنینیانی هەیە”.
ئاماژەی بەوەش کرد، “گواستنەوەی نەختینە چ دینار بێت چ دۆلار یان هەر دراوێکی دیکە لە ناوخۆی عێراقدا رێگەپێدراوە، بەڵام بردنە دەرەوەی پارە لە خاڵە سنوورییەکان تا 10هەزار دۆلار رێگەپێدراوە، رێوشوێنە ئەمنییەکان لە بازگە و خاڵە سنوورییەکان رێوشوێنی توند گیراوەتە بەر بەمەبەستی رێگریکردن لە بەقاچاخبردنی پارە”.
