بەیانی ئەمڕۆ 14 ی کانونی یەکەم، تەرمی پیاوێک کە ئاسەواری فیشەکی پێوەیە لەنێوان ناحیەی شۆرش و سەنگاو دۆزرایەوە.
ڕەمەک ڕەمەزان، قائیقامی قەزای چەمچەماڵ، بە تۆڕی میدیایی ئێستای ڕاگەیاند، “بەیانی ئەمڕۆ ئاگادارکراینەوە کە تەرمی پیاوێک لە گوندی مەنیلە لە نێوان ناحیەی شۆرش و سەنگاو دۆزراوەتەوە، و ئاسەواری چەند فیشەکێک بە مل و سەریەوە بووە”.
قائیقامی چەمچەماڵ وتیشی، “پیاوەکە هیچ ناسنامەیەکی پێنییە و نێردراوە بۆ پزیشکی دادوەری بۆ لێکۆڵینەوە لەسەری، بەڵام بڕی نزیکەی 600هەزار دیناری عێراقی پێبووە و نەبراوە”.
قائیمقامی چەمچەماڵ ڕاشیگەیاند، لێکۆڵینەوەیان لەسەر ڕوداوەکە دەستپێکردووە و تەرمەکەش لە پزیشکی دادوەرییە بۆ لێکۆڵینەوە و دۆزینەوەی ناسنامەکەی.
