قوباد تاڵەبانی، پێشوازیکرد لە عوساف سەعید سکرتێری وەزارەتی دەرەوەی هیندستان و لە کۆبوونەوەی نێوانیان تاوتوێی چۆنیەتی پەرەپێدانی پەیوەندییەکانی نێوان هەرێم و وڵاتی هیندستان کرا.
لە کۆبوونەوەکەدا کە ئەمڕۆ لە هەولێر بەڕێوەچوو و تیایدا دابان شەدەڵە، جێگری بەرپرسی فەرمانگەی پەیوەندییەکانی دەرەوەی هەرێم و باڵیۆز و کونسوڵی هیندستان ئامادەی بوون، باس لە چاکسازی و پرۆسەی بە ئەلیکترۆنیکردنی دامەزراوەکانی حکومەت کرا.
قوباد تاڵەبانی ئاماژەی بە پێشکەوتنەکانی هیندستان لە بواری حکومەتی ئەلیکترۆنی کرد و رایگەیاند، هەرێمی کوردستان بۆ سەرخستنی هەنگاوەکانی پرۆسەی حکومەتی ئەلیکترۆنی لەپێناو نەهێشتنی رۆتین و گەندەڵی پێویستیی بە کەڵکوەرگرتن لە ئەزموونی دەوڵەمەندی هیندستان هەیە.
لە بەشێکی دیکەی کۆبوونەوەکەدا قوباد تاڵەبانی باسی لە پێویستیی رێکخستنەوە و بە ئەلیکترۆنیکردنی سیستمی بانکی کرد و لەم چێوەیەشدا کە وڵاتی هیندستان زۆر پێشکەوتوون، داوای هەماهەنگی لێکردن.
سکرتێری وەزارەتی دەرەوەی هیندستانش لە کۆبوونەوەکەدا ویستی وڵاتەکەی بۆ پەرەپێدانی پەیوەندییەکانی لەگەڵ هەرێمی کوردستان دەربڕی و راشیگەیاند، ئامادەن بۆ هاوکاریکردنی حکومەتی هەرێم لەڕووی گواستنەوەی ئەزمونی ئەو وڵاتە بۆ سەرخستن و بەرەوپێشبردنی حکومەتی ئەلیکترۆنی.
