به تۆمه‌تی دزینی ئۆتۆمبێل، كەسێك لەلایەن مه‌فره‌زه‌كانی بنكه‌ی پۆلیسی زه‌ڕایه‌نەوە دەستگیركرا.
بەپێی راگەیەندراوی بەڕێوەبەرایەتیی پۆلیسی پارێزگای سلێمانی، تۆمه‌تبارەكە له شاری به‌غداد ئۆتۆمبێلی كڕیوه و ئامێری (GPS)ی تێدا جێگیركردووه و سویچی ئۆتۆمبێله‌كه‌شی كۆپیكردووه و دوای فرۆشتنه‌وه‌ی ئۆتۆمبێله‌كه، شوێنەكەی زانیوه و دزیویه‌تی و جارێكی تر فرۆشتوویه‌تییه‌وه.
پۆلیس دەڵێت، هێزه‌كانیان زانیارییان لەبارەی تۆمەتباركەوە كۆكردووەتەوە و مه‌فره‌زه‌كانی بنكه‌ی پۆلیسی زه‌ڕایه‌نی سه‌ر به به‌شی پۆلیسی شاره‌زوور، شوێنی تۆمه‌تبارەكەیان ده‌ستنیشانكردووە و ده‌ستگیریانكردووە.
تۆمه‌تبار (ن، خ، م) له‌دایكبووی 1992ـە و “دانی به تاوانه‌كه‌یدا ناوه” و به بڕیاری دادوه‌ر و به‌پێی یاسای سزادانی عێراقی راگیراوه، وەك پۆلیسی پارێزگای سلێمانی رایگەیاندووە.
