سەرۆکی ئەمریکا جۆ بایدن، توندوتیژیی بە بەکارهێنانی چەک لە وڵاتەکەیدا بە پەتایەک وەسف کرد و داوای لە کۆنگرێس کرد هەنگاو بنێت بۆ رووبەڕووبوونەوەی.
کۆشکی سپی لە راگەیەندراوێکی سەرۆکی وڵاتەکەیدا بڵاویکردەوە، لە 48 رۆژی سەرەتای ئەمساڵەوە وڵاتەکەمان لانیکەم 73 رووداوی تەقەکردنی بەخۆوە بینیوە، بۆیە تەنها دوعاکردن بەس نییە، توندوتیژی بە چەک پەتایەکە و دەبێت کۆنگرێس لە ئێستاوە هەنگاوی بۆ بنێت.
بایدن ئاماژەی بەوەدا کە دوای رووداوی تەقەکردنەکەی دوێنێ هەینی لە میسیسیپی، دەزگا ئەمنییەکانی فیدراڵی لە پەیوەندییەکی نزیکدان لەگەڵ دەسەڵاتدارانی ویلایەتەکەدا، بایدن فەرمانی داوە کە پشتیوانیی تەواوی دەسەڵاتە فیدراڵیەکان بە ئیدارەی ناوخۆیی بدرێت بۆ رووبەڕووبوونەوەی.
ئاماژەی بەوەشکرد، پێویستە لەسەر بنەمای عەقڵی ساغ چاکسازی لە یاسای هەڵگرتنی چەکدا بکەین، ئەمەش بەوە دەستپێدەکات چاودێری دابنرێت بۆ فرۆشتنی چەک، قەدەغەکردنی بازرگانیکردن بە چەکی هێرشبەر و فرۆشگاکانی تەقەمەنی، مەرجدارکردنی هەڵگرتنی چەک و لابردنی بەرگری لە بەرهەمهێنەرانی چەک کە بە ئارەزووی خۆیان چەکی سەربازی لەسەر شەقامەکان دەفرۆشن.
