بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان لەگەڵ نوێنەرانی هەزاران مامۆستای وانەبێژ لە هەرێمی كوردستان كۆبووەوە.
لە كۆبوونەوەكەدا نوێنەرانی مامۆستایانی وانەبێژ لە هەرێم لەبارەی كێشە و گرفتەكانیان، دانەمەزراندن و بەهەند وەرنەگرتنی خواستەكانیان لەلایەن حكومەت و وەزارەتی پەروەردەوە راپۆرتێكیان خستەڕوو و لەچەند خاڵێكیشدا داواكارییەكانیان روونكردەوە.
لە بەرامبەردا سەرۆك بافڵ جەلال تاڵەبانی دوای گوێگرتن لە گرفت و ناڕەزایەتییەكانیان، پاڵپشتیی خۆی و یەكێتی بۆ داواكاری مامۆستایانی وانەبێژ دەربڕی و رایگەیاند، “یەكێتی ئەم پرسە گرنگە بەهەند وەردەگرێت چونكە پەیوەستە بە زیاتر لە 30 هەزار مامۆستاوە كە بەشێكی گرنگ و كاریگەرن لەپڕۆسەی پەروەردە و فێركردندا. وتیشی، نابێت چیتر خزمەت و هەوڵەكانتان نادیدە بگیرێت و كەمتەرخەمیتان دەرحەق ئەنجامبدرێت چونكە هیچ شانازییەك لە فەرامۆشكردن و نادیدەگرتنی چینێكی گرنگی كۆمەڵگەدا نییە كە پەروەردەی منداڵەكانمان دەكەن و خەرجكردنی شایستە داراییەكانیشتان هەرجارە و لەژێر ناونیشانێكدا نیشانەی سەرسووڕمانە و مافخواردنێكی ئاشكرایە”.
لەبارەی گرنگی پرۆسەی پەروەردە و فێركردن لە هەرێمی كوردستان و هەوڵەكان لەپێناو پەروەردەكردنی نەوەیەكی هۆشیار و زانستخواز سەرۆك بافڵ وتی، “ئەگەر بمانەوێت كۆمەڵگەیەكی پێشكەوتوو بونیادبنێین و نەوەیەكی سوودبەخش پێشكەشی كۆمەڵگە بكەین ئەوا پێویستە گۆڕانكاری ڕیشەیی لە سیستمی پەروەردە بكەین و رۆڵی مامۆستایان رێزلێگیراوبێت.
لای ئێمە كەرتی پەروەردە زۆر لە نەوت و غاز گرنگترە”، بۆیە بەڵێنتان پێدەدەین خەم و كێشەكانتان لەئەستۆ دەگرین و لە هەوڵەكانمان بۆ دەستەبەركردنی ژیانێكی شایستە و شەرەفمەندانە بەردەوامدەبین”.
