بەشى پێشبینیی كەشوهەوا لە وەزارەتی گواستنەوە و گەیاندنی هەرێمی كوردستان، پێشبینییەكانی كەشوهەوای ئەمڕۆ و سبەینێی بڵاوكردەوە و دەڵێت، “ئەمڕۆ بەفربارین بەردەوامدەبێت”.
بەپێی راگەیەندراوی بەشى پێشبینیی كەشوهەوا لە وەزارەتی گواستنەوە و گەیاندن، ئەمڕۆ پێنجشەممە ئاسمان هەوردەبێت لەگەڵ دابارینی نمەباران و بەفر لە ناوچەکانی باکووری رۆژهەڵاتی هەرێم و لە ناوچەکانی رۆژهەڵاتی هەرێم و سەنتەری شاری سلێمانی و دەوروبەری.
ئاشكراشیكردووە، لە کاتەکانی ئێوارە دابارین لە زۆربەی ناوچەکان رادەوەستێت و ئاسمان بەرەو نیمچەهەور دەگۆڕێت.
لەبارەی پێشبینییەكانی كەشوهەوای سبەینێ هەینییەوە، بەشى پێشبینیی كەشوهەوا رایگەیاندووە، “ئاسمان لەنێوان ساماڵ و نیمچەهەور دەبێت و لە کاتەکانی بەیانیی زوودا ئەگەری دروستبوونی تەم هەیە. پلەکانی گەرما بۆ نزمترین پلە دادەبەزن و بەرزترین پلەش کەمێک بەرزتر بە (1-2) پلە بە بەراورد بە تۆمارکراوەکانی ئەمڕۆ دەبن”.
