بەڕێوەبەری كشتوكاڵی سلێمانی رایدەگەیەنێت، بەهۆی بڵاوبوونەوەی ئەنفلۆنزای باڵندەوە، هاوردەكردنی مریشك و هێلكە لە توركیاوە بۆ هەرێمی كوردستان قەدەغەكرا و دەشڵێت، “لە دوێنێوە فەرمانی وەزاریی دەركراوە و خراوەتەبواری جێبەجێكردنەوە”.
شاڵاو جەمال، بەڕێوەبەری كشتوكاڵی سلێمانی لە لێدوانێكدا بە تۆڕی میدیایی ئێستای راگەیاند، لە توركیا ئەنفلۆنزای باڵندە بڵاوبووەتەوە و لە هەرێمی كوردستان رێوشوێنی پێویست دەگیرێتەبەر و بۆ ئەو مەبەستە بڕیاردراوە هاوردەكردنی مریشكی سەربڕدراو و هێلكە لە توركیاوە قەدەغەبكرێت.
راشیگەیاند، وەزارەتی كشتوكاڵی هەرێم لە دوێنێوە فەرمانی وەزاریی دەركردووە كە هاوردەكردنی مریشك و هێلكە لە توركیاوە بۆ هەرێمی كوردستان قەدەغە بكرێت و بڕیارەكە خراوەتە بواری جێبەجێكردنەوە.
