وەزارەتی پلاندانانی عێراق، لە دوایین ئاماریدا ڕایگەیاند ڕێژەی %22ی دانیشتوانی عێراق لە ژێر هێڵی هەژارییەوەن و ئەم ڕێژەیەش لە سەرەتای ئەمساڵەوە بە ئاستێکی زۆر بەرزبووەتەوە.
بە پێی دواین ئامار کە وەزارەتی پلاندانانی عێراق بڵاویکردووەتەوە، عێراق لە ئێستادا ڕێژەی %22ی دانیشتوانەکەی لە ژێر هێڵی هەژارییەوەن و هۆکارەکەشی بۆ ئەو قەیرانە داراییە دەگەڕێنێتەوە کە ڤایرۆسی کۆرۆنا و دابەزینی نرخی نەوت دروستی کردووە.
شارەزایانی ئابوری لە عێراق ئاماژە بەوەدەکەن کە سیاسەتی ئابوریی عێراق سیاسەتێکی بێسەروبەرییە ئەمەش کاریگەریی کردووەتە سەر شێوازی ژیان و ڕێکخستنی کەرتی ئابوری لە وڵات و بەرزبوونەوەی ژمارەی بێکاری لە وڵاتەکەدا.
باسلەوەشدەکەن کە زیادبوونی هەڕەمەکی ژمارەی دانیشتووان و بەرامبەر بەو بەرهەمە خۆراکییانەی لە عێراقدا هەن بە بەرهەمە ناوخۆییەکان و ئەو بەرهەمانەشی هاوردە دەکرێن کەمترە، لەگەڵ ئەوەشدا هاتنە ناوەوەی دەستی کاری دەرەکی بۆ عێراق بووەتە هۆی زیاتر بوونی بێکاری و بەرزبوونەوەی هەژاری.
بەپێی بۆچوونی شارەزایانی ئابوریی عێراقی هۆکارێکی دیکەی بەرزبوونەوەی ڕێژەی هەژاری کەمبوونەوەی کار و راگرتنی کۆمپانیاکانی کەرتی تایبەتە کە بووەتە هۆی نەمانی سەرچاوەی دارایی بەشێک لە خێزانە عێراقییەکان.
وەزارەتی پلاندانان پارێزگای موسەنای وەک هەژارترین پارێزگا داناوە لە عێراقدا کە ڕێژەی هەژاری تێیدا %52ی دانیشتوانەکەیەتی.
بەپێی هەڵسەنگاندنەکانی سندوقی دراوی نێودەوڵەتی ڕێژەی بێکاری و هەژاری لە عێراق لەبەرزبوونەوەدا دەبێت لە ماوەیەکی کورتدا بە ڕێژەی %7 بۆ %14 هۆکارەکەشی بۆ قەیرانی دارایی لە عێراق دەگەڕێنێتەوە.
