جێگری سەرۆكی ژووری بازرگانیی سلێمانی رایدەگەیەنێت، بڕیارەكەی حكومەتی عێراق بۆ دابەزاندنی بەهای دۆلار، كاریگەری لەسەر دابەزینی نرخی شمەك و كاڵا و ماددە خۆراكییەكان دەبێت.
نەوزاد غەفور جێگری سەرۆكی ژووری بازرگانیی سلێمانی لە لێدوانێكدا بە تۆڕی میدیایی ئێستای راگەیاند، بڕیارەكەی حكومەتی عێراق دەبێتە هۆی دابەزینی نرخی شمەك و كاڵا و بە تایبەت ماددە خۆراكییەكان، وتیشی، “بەڵام دەبێت بازرگانەكان پارەكانیان لە رێگای بانكەوە بكەنە دۆلار و ئەو هەنگاوەی حكومەتی عێراق تایبەت بە حەواڵە و بە ئەلیكترۆنیكردنی دەیگرێتەبەر كاریگەری لەسەر دابەزینی بەهای دۆلار بەرامبەر دینار دەبێت.
بە بڕوای جێگری سەرۆكی ژووری بازرگانیی سلێمانی دابەزاندنی شمەك و ماددەخۆراكییەكان دەكەوێتە سەر ئەو شێواز و كاتی جێبەجێكردنی بڕیارەكەی حكومەتی عێراق كە بۆ دابەزاندنی بەهای دۆلار بەرامبەر دیناری عێراقی دەریكردووە.
