بەڕێوەبەرایەتیی پۆلیسی پارێزگای سلێمانی دەڵێت، مەفرەزەکانی بنکەی پۆلیسی هه‌واری شار لە سلێمانی تۆمەتبارێكیان دەستگیرکرد كه ھەڕەشەی بڵاوکردنەوەی ڤیدیۆ و وێنە تایبەتییەکانی له ژنێك كردبوو.
بەپێی راگەیەندراوی پۆلیس، ژنێک سکاڵای یاسایی تۆمارکردووە بەوەی کە كه‌سێك ھەڕەشەی بڵاوکردنەوەی ڤیدیۆ و وێنە تایبەتییەکانی لێدەکات، دواتر ھێزەکانی پۆلیس لێکۆڵینەوەکانیان دەستپێکرد بۆ دۆزینه‌وه و ده‌ستگیركردنی تۆمه‌تبار و توانرا تۆمەتبار بدۆزرێتەوە و لەلایەن مەفرەزەکانی بنکەی پۆلیسی هه‌واری شارەوە دەستگیربکرێت.
پۆلیسی پارێزگای سلێمانی راشیگەیاندووە، تۆمەتبار (ح، ن، م) له‌دایكبووی ساڵی 2000 بە بڕیاری دادوەر و بەپێی ماددەی 2ـی خراپبەکارھێنانی ئامێرەکانی پەیوەندیکردن راگیراوه و لێکۆڵینەوەکان بەردەوامن.
