بەرێوەبەرایەتیی پاسپۆرتی پارێزگای هەڵەبجە رایگەیاند، کارەکانی دەرهێنان و نوێکردنەوەی پاسپۆرتیان لە بەڕێوەبەرایەتییەکەیان راگرتووە و هۆکارکەشی نەبوونی دەفتەری پاسپۆرتە.
لە راگەیەندراوێکدا پاسپۆرتی هەڵەبجە ئاشکرایکرد، هاوڵاتییانی ناوەندی هەڵەبجە و قەزاکانی سەیدسادق و شارەزوور ئاگاداردەکەینەوە، بەهۆی نەبوونی دەفتەری پاسپۆرت، سەرجەم مامەڵەکان کە بۆ دەرهێنان و نوێکردنەوەی پاسپۆرت دەکرێت لە ئێستادا لە بەڕێوەبەرایەتی ڕاگیراون.
پشتڕاستی کردەوە کە لە ئەگەری وەرگرتنی دەفتەری پاسپۆرتدا، ئەو هاووڵاتیانە ئاگادار دەکەنەوە کە مامەڵەکانیان تەواوبووە و کارەکان دەستپێدەکەنەوە.
لەوبارەیەوە پێشتر عەمید سالار عەبدوڵا بە تۆڕی میدیایی ئێستای راگەیاند، “کارەکانی بەڕێوەبەرایەتیی پاسپۆرتی سلێمانی بەردەوامە و سیستمەکەمان کاردەکات، ئەوەی هەیە کەمی دەفتەرە لەسەرتاسەری عێراقدا”.
بەپێی وتەی بەڕێوەبەری پاسپۆرتی سلێمانی، پێشتر سەرۆک وەزیرانی عێراق و وەزیری ناوخۆ سەردانی بەڕێوەبەری گشتیی پاسپۆرتی عێراقیان کردووە و دەستوەردانیان کردووە بۆ چارەسەرکردنی کێشەکە و وەزیری ناوخۆی عێراق لەسەر خەتە بۆ چارەسەرکردنی.
ئاماژەی بۆ ئەوەش کردووە، “ئێستا دەفتەر هەیە بەڵام بڕی پێویست نییە و ئارەزوومەندانە نییە تەنها بۆ ئەوکەسانە هەیە کە حاڵەتەکەیان زەروورە”.
