دەستەی دەستپاكیی عێراق دەڵێت، تەنها لە یەك دۆسیەدا 3.2 ملیار دیناری گەڕاندووەتەوە بۆ حكومەت.
بەپێی راگەیەندراوێكی دەستەی دەستپاكیی عێراق، پشتبەست بە رێكارەكانی لێكۆڵینەوە، سێ ملیار و 200 ملیۆن دیناری گەڕاندووەتەوە بۆ لقێكی بانكی پیشەسازی لە بەغداد.
دەستەی دەستپاكیی عێراق ئاماژەی بۆ ئەوە كردووە كە فەرمانگەی لێكۆڵینەوەكانی سەر بە دەستەكە، لەسەر داوای بانكی پیشەسازی پارەكەی گەڕاندووەتەوە.
ئاشكراشیكردووە كە ئەو پارەیە ساڵی 2016 بە قەرز دراوە بە كۆمپانیایەكی وەبەرهێنان بە مەبەستی دروستكردنی كارگەیەكی ریسایكلینی خاشاك، بەڵام پڕۆژەكە جێبەجێنەكراوە و ساختە بووە و پارەكە براوە، دوای لێكۆڵینەوە توانراوە كۆی پارەكە كە سێ ملیار و 200 ملیۆن دینار بووە بگەڕێندرێتەوە بۆ بانكی پیشەسازی.
