بەهۆی پاڵنان و پاڵەپەستۆی هاندەرانەوە، لە یاریگەی نێودەوڵەتیی بەسڕە كەسێك گیانیلەدەستدا و 60 كەسی تر برینداربوون.
بڕیارە كاتژمێر حەوتی ئێوارەی ئەمڕۆ پێنجشەممە، یاریی كۆتایی پاڵەوانێتیی جامی كەنداوی 25 لە بەسڕە بەڕێوەبچێت.
یارییەكە لە نێوان هەردوو هەڵبژاردەی عێراق و عوماندا بەڕێوەدەچێت و لە درەنگانی شەوی رابردووەوە، ژمارەیەكی زۆری هاندەرانی عێراقی بۆ پشتیوانیكردنی هەڵبژاردەی وڵاتەكەیان روویان لە شاری وەرزشیی بەسڕە كردووە.
كەمێك لەمەوبەر و لە كاتی هەوڵدانیان بۆ چوونەناو یاریگەی نێودەوڵەتیی بەسڕە، پاڵەپەستۆیەكی زۆر لە نێو هاندەراندا دروستبوو، بەهۆی پاڵپێوەنانەوە كەسێك گیانیلەدەستدا و 60 كەسی تریش برینداربوون.
