میرنشینی عومان، پێشوازی لە ڕێككەوتنەكەی دوێنێی مەغریب و ئیسرائیل دەكات.
دوێنێ دۆناڵد ترەمپ سەرۆكی ئەمریكا، ئیمزاكردنی ڕێككەوتنی ئاشتی لەنێوان مەغریب و ئیسرائیل-دا ڕاگەیاند، ئەمڕۆ هەینی 11ی كانونی یەكەم، وەزارەتی دەرەوەی عومان ڕایگەیاند، “پێشوازی لە دروستبوونی پەیوەندیی دیپلۆماتی لەنێوان مەغریب و ئیسرائیل-دا دەكات و هیواخوازە ئەو هەنگاوە ببێتە هۆی بەهێزكردنی هەوڵەكانی ئاشتی لە خۆرهەڵاتی ناوەڕاستدا.”
پێشتر و لەكاتی ڕێككەوتنی ئیسرائیل و ئیمارات و بەحرەین دا، میرنشینی عومان پێشوازی لەو دوو ڕێككەوتنە كردبوو، ئەوكات سیت فرینتزمان، شیكەرەوەی سیاسەتی خۆرهەڵاتی ناوەڕاست لە وتارێكدا ڕایگەیاندبوو، “پشتگیریكردنی عومان لە ڕێككەوتنی ئیسرائیل و وڵاتانی عەرەبی، هەڕەمەكی و ڕێكەوت نییە، بەڵكو ئاماژەیە بۆ ویستی عومان بۆ ئەوەی لەگەڵ ئیسرائیل دا ڕێكبكەوێت.”
هەرچەندە وەزیری دەرەوەی عومان ساڵی ڕابردوو وتبووی: “عومان لەگەڵ ئیسرائیل دا ڕێكناكەوێت”، ئەوا پشتیوانیكردنی وڵاتەكەی لە ڕێككەوتنی ئیسرائیل لەگەڵ ئیمارات و بەحرەین و سودان و مەغریب دا، وەك چاودێران شیكردنەوەی بۆدەكەن، ئاماژەیەكی ڕوونە بۆ ویستی عومان بۆ ڕاگەیاندنی ئاشتی لەگەڵ ئیسرائیل-دا، بەتایبەت دوای ئەوەی لە ماوەی چەند مانگی ڕابردوودا بنیامین نەتانیاهو، سەرۆكوەزیرانی ئیسرائیل سەردانی ئەو وڵاتەی كردبوو، پاشان و دوای مردنی شا قابووس پادشای عومان، نەتەنیاهو ناوبراوی بە “پیاوێكی مەزن” ناوزەد كردبوو.
