قائیمقامی کۆیە ڕایگەیاند، شەوی ڕابردوو تەقە لەماڵەکەی کراوە و وەک خۆی دەلێت ئەو کەسەی تەقەی کردووە ناسراوەتەوە و دەزانن کێیە.
یوسف حەسەن، قائیمقامی قەزای کۆیە، ئەمڕۆ 12 ی کانونی یەکەم لە کۆنگرەیەکی ڕۆژنامەوانیدا ڕایگەیاند، “ئەو کەسەی تەقەی لە ماڵەکەی من کردووە پێشتر لەسەر زیادەڕۆی ڕوبەڕوی یاساکراوەتەوە و ڕێگە نەدراوە زیادەڕۆییەکەی بکات”.
قائیمقامی کۆیە ڕاشیگەیاند، “تەقەکەرەکە پێشتر هاتووەتە نزیک ماڵی ئێمە و چاوەڕێی کردووە تا من بگەڕێمەوە، دواتر دوای گەڕانەوەم دەستڕێژی لە ماڵەکەم کردووە و لەلایەن پاسەوانەکانمەوە وەڵامدراوەتەوە”.
وەک قائیمقامی کۆیە باسی دەکات، ئەو کەسەی کە تەقەیکردووە لە کامێراکانی چاودێری دەرچووە کە نارنجۆکێی بە دەستەوە بووە و ویستویەتی هەڵیباتە ماڵی یوسف حەسەنەوە.
