بەڕێوەبەرایەتیی پۆلیسی راپەڕین رایدەگەیەنێت، بریندارێك گەیەندراوەتە نەخۆشخانەی گشتیی قەڵادزێ كە شوێنەواری دوو چەقۆ بە جەستەیەوە بووە و لەسەر فول لایت برینداركراوە.
بەپێی راگەیەندراوێكی بەڕێوەبەرایەتیی پۆلیسی راپەڕین كە وێنەیەكی دەست تۆڕی میدیایی ئێستا كەوتووە و تێیدا هاتووە، شەوی چوارشەممە، گەنجێك بە ناوی (هـ، م، ح) لەدایكبووی ساڵی 2002 كە دانیشتووی قەڵادزێیە و كاسبە، بە برینداری گەیەندراوەتە نەخۆشخانەی گشتیی شارەكە.
لە راگەیەندراوەكەدا هاتووە، “لە گەڕەكی راپەڕین لەسەر فول لایت كەسێك بە چەقۆ هێرشیكردووەتە سەری و بە سەختی برینداریكردووە و دواتر لە لایەن دوو هاوڕێی گەیەندراوەتە نەخۆشخانە و بەهۆی سەختیی برینەكەیەوە، ڕەوانەی سلێمانی كراوە”.
ئاماژە بۆ ئەوەش كراوە، دوای رووداوەكە پۆلیسی راپەڕین تۆمەتبارەكەی دەستگیركردووە و پەڕاوی لێكۆڵینەوەیان بۆ رووداوەكە كردووەتەوە.
