بەهۆی فشارەکانی ئیدارەی یانەی ڕۆما-وە، جوزێ مۆرینیۆ پۆستی ڕاهێنەری هەڵبژاردەی بەڕازیلی ڕەتکردووەتەوە.
دوای ئەوەی کارلۆس ئالبێرتۆی یاریدەدەری پێشووی مۆرینیۆ ڕایگەیاند، کە لەلایەن فیدراسیۆنی تۆپی پێی بەڕازیلەوە داوای مۆرینیۆ کراوە و جەمسەرەکان نزیکن لە ڕێککەوتنەوە، ڕۆژنامەی “سپۆرت”ی ئیسپانی بڵاویکردەوە، کە “سپێشەڵ وەن” بڕیاریداوە لە ڕۆما بەردەوامبێت و جێگەی “تیتی” نەگرێتەوە.
بەپێی سەرچاوەکە، فیدراسیۆنی بەڕازیل ئامانجی دابینکردنی ڕاهێنەرێکی بیانییە، بۆ ئەو مەبەستەش لەگەڵ چەندینێکی دیکە دانوستاندنیان دەستپێکردووە، لە ئێستادا سەرنجی تەواویان خستووەتە سەر زینەدین زێدانی فەرەنسی و ڕاهێنەری پێشووی یانەی ڕیاڵ مەدرید.
