حكومەتی عێراق لە هەوڵدایە بەرانبەر بە فرۆشتنی نەوت بە چین، ملیاران دۆلار پێشوەختە لەو وڵاتە وەربگرێت، ئەوەش یارمەتی دەدات لە كەمكردنەوەی كاریگەرییەكانی قەیرانی دارایی و دابینكردنی موچە.
ڕێككەوتنەكە لەنێوان كۆمپانیای سۆمۆ-ی عێراقی و چینخوا ئۆیڵ-ی چینی دا دەكرێت، سەرەتا عێراق دوو ملیار و 500 ملیۆن دۆلار پارەی نەوت بە پێشەكی و بە كاش وەردەگرێت، لە بەرانبەردا 48 ملیۆن بەرمیل نەوت لە ماوەی ساڵێكدا بە چین دەفرۆشێت و ماوەكەش لە تەموزی ساڵی 2021ـەوە دەستپێدەكات تا حوزەیرانی 2022 درێژەی دەبێت.
بە گوێرەی زانیارییەكان، عێراق هەوڵدەدات ئەو پلانە بۆ ماوەی پێنج ساڵ درێژەپێبدات و جگە لە چین، لەگەڵ وڵات و كۆمپانیای تریشدا ڕێكبكەوێت بۆ ئەوەی پارەی نەوت بە پێشەكی وەربگرێت و دواتر نەوت هەناردە بكات، بەڵام بەپێی ڕێككەوتنەكەی لەگەڵ چین تەنها لە ساڵی یەكەمدا پارەی نەوت بە پێشەكی وەردەگرێت.
ئەم پلانە ئابورییەی عێراق، لەلایەن كۆمپانیای بە بازاڕكردنی نەوت “سۆمۆ”وە داڕێژراوە و لە مانگی ڕابردوودا كۆمپانیاكە پێشنیارەكەی ناردووە بۆ كۆمپانیاكانی كڕیاری نەوت لە جیهاندا، پێی ڕاگەیاندوون هەر كۆمپانیایەك بڕی 2.5 ملیار دۆلار بدات بە عێراق، ئەوا مانگانە و بۆ ماوەی ساڵێك عێراق چوار ملیۆن بەرمیل نەوتی پێدەدات.
