ئەستێرەی دێرینی ئینگلتەرا و یانەی مانچستەر یونایتد، فیڵ نیڤیڵ بەرگری لە ئولی گۆنار سۆڵشایەری ڕاهێنەری نەرویجی دەکات و دووپاتیدەکاتەوە، ئەوەی بەسەر یانە سوورەکەدا هاتووە کارەسات نییە.
نیڤیڵ بە “بی بی سی ڕادیۆ”ی ڕاگەیاندووە، ” ئەگەر یونایتد شەممەی داهاتوو براوەبێت واتا لە ساتە هەستیارەکاندا سەرکەوتوبوون، بەرانبەر لایپزیچ تەنها 30 خولەکی سەرەتا خراپ یارییانکرد و تۆپی پێ سزایدان و لە خولی یانە پاڵەوانەکان کرانە دەرەوە، ئێستا ئەوان بەشداری خولی ئەوروپین، پێویستە نازناوەکە بچننەوە”.
ئەستێرە دێرینەکەی ئینگلاند کە لە ئێستادا ڕاهێنەری هەڵبژاردەی کچانی بەریتانیایە، دەڵێت، ” چیرۆکێکی بێواتایە، هەوڵدەدرێت سۆڵشایەر دووربخرێتەوە، ئەگەر یانەیەک لە کۆتا ساتەکاندا بدۆڕێت کارەساتە، ئەوەی لەگەڵ یونایتد ڕوویدا کارەسات نەبوو، بەڵام بێزارکەربوو، هەوڵیاندا بگەنە قۆناغی 16 و نەیانتوانی، پێموایە جیاوازی لە نێوان یونایتدی سۆڵشایەر و ڕاهێنەرانی پێش خۆیدا هەیە، تەنانەت لەسەردەمی سێر ئەلێکس فێرگسۆنیش لەم قۆناغەدا دەرکراون، بەڵێ ئەوە ڕوویداوە..”.
لە کۆتا ڕوبەڕوبوونەوەی قۆناغی کۆمەڵەکانی چامپیۆنزلیگ، یانەی مانچستەر یونایتدی ئینگلیزی بەرانبەر لایپزیچی ئەڵمانی دۆڕاندنی تۆمارکرد، بەپێی ئەم ئەنجامە ژمارەی خاڵەکانیان لە (9)دا جێگیربوو، کە ئەوەش واتای ماڵئاواییکردنیان دەبەخشێت لە خولی یانە پاڵەوانەکانی ئەوروپا.
میدیاکانی بەریتانیا و شرۆڤەکارانی کەناڵە ئینگلیزییەکان ڕەخنەی توندیان ئاڕاستەی سۆڵشایەر کردووە و بەهۆکاری سەرەکی شکستەکەیان لە قەڵەمداوە، بەڵام بە پێچەوانەی هەمووانەوە فیڵ نیڤیڵ بەرگری لێدەکات و دووپاتیدەکاتەوە، دۆڕاندن بەرانبەر لایپزیچ و دەرکردنیان لە چامپیۆنز لیگ هەرگیز کارەسات نییە.
