بە نوێنەرایەتیی بافڵ جەلال تاڵەبانی سەرۆکی یەکێتیی نیشتمانیی کوردستان پەیامی پیرۆزبایی لەدایکبوونی حەزرەتی مەسیح گەیەندرایە کڵێسای ماریوسف و قبتییەکان لە سلێمانی و جەخت لە پاراستنی مافەکانیان کرایەوە.
سالار سەرحەد خەلیفەیونس ئەندامی سەرکردایەتی و لێپرسراوی بۆردی پەیوەندییە کوردستانییەکان، بە بۆنەی جەژنی لەدایک بوونی حەزرەتی مەسیح سەلامی خودای لەسەربێت، پەیامی بافڵ جەلال تاڵەبانی سەرۆکی یەکێتیی نیشتیمانیی کوردستان و مەکتەبی سیاسیی گەیاندە خوشک و برا کریستیانەکان لە ھەردوو کڵێسای ماریوسف و قبتییەکان لەسلێمانی.
لە پەیامەکەدا وێڕای پیرۆزبایی کردن جەختکراوەتەوە کە سیاسەتی ئێستای یەکێتی درێژەپێدانە بە سیاسەتی حەکیمانەی سەرۆک مام جەلال بۆ خزمەت و پاراستنی مافی پێکھاتەکان و قوڵترکردنەوەی کلتووری پێکەوەژیانی ئاشتییانە لە ھەرێمی کوردستان و عێراق و وەک هەمیشەش یەکێتی پارێزەری بەدیهێنانی مافەکانی خوشک و برا مەسیحییەکان دەبێت.
