بافڵ جەلال تاڵەبانی، سەرۆکی یەکێتیی نیشتمانیی کوردستان سەردانی کۆسرەت رەسول عەلی، سەرۆکی ئەنجومەنی باڵای سیاسی و بەرژەوەندیی یەکێتیی نیشتمانیی کوردستانی کرد.
لە دیدارەکەدا بافڵ جەلال تاڵەبانی وێڕای هەواڵپرسی و هیوای تەندروستییەکی باش بۆ کاک کۆسرەت، کورتەیەکی لەبارەی دوایین هەنگاوەکانی یەکێتیی نیشتمانیی کوردستان لە پرۆسەی سیاسی خستەڕوو، مێژووی پڕ سەروەری و خەباتی کاک کۆسرەتی بەرزنرخاند کە هەمیشە لە سەنگەری پێشەوەی بەرگری بووە لە خاکی کوردستان و ژیانی خۆی لەو پێناوەدا بەخشیوە.
دڵنیاییشیدا کە یەکێتی نزیکە لە بەدیهێنانی ئەو خەون و ئامانجانەی کاک کۆسرەت خەباتی بۆ کردووە و وتی، ئێمە بە شوێنپێی سەرۆک مام جەلال و کاک کۆسرەت و هەموو سەرکردە تێكۆشەرەکانی تردا هەنگاودەنێین و یەکێتییەکەمان دەپارێزین.
