شەوی رابردوو لە سنووری ناحیەی باوەنووری سەر بە ئیدارەی گەرمیان مۆبایل بە مێردمنداڵێکدا تەقییەوە و بەهۆیەوە گیانیلەدەستدا.
پەیامنێری تۆڕی میدیایی ئێستا گواستییەوە، “ئێوارەی دوێنێ لە گوندی عیسایی سەر بە ناحیەی باوەنوور، مێردمنداڵێک لە ماڵەکەی خۆیاندا مۆبایلی کردووە بە شەحنەوە و خۆی لە پاڵیدا دانیشتووە و لەوکاتەدا مۆبایلەکە تەقیوەتەوە و زۆرینەی جەستەی سووتاوە”.
ئاماژەی بەوەشکرد، “مێردمنداڵەکە ناوی ویسام عەلییە و تەمەنی 16 ساڵە و یاریزانی کیک بۆکسێن بووە، بەهۆی زۆری برینەکەیەوە گواستراوەتەوە بۆ نەخۆشخانەی سووتاوی لە شاری سلێمانی”.
ئاشکراشیکرد، “بەیانی ئەمڕۆ بەهۆی زۆری سووتاوییەکەیەوە لە سلێمانی گیانیلەدەستدا و تەرمەکەی گەڕێندرایەوە بۆ ناوچەکەی خۆیان بەمەبەستی بەخاکسپاردنی”.
