منداڵێكی تووشبووی تالاسیما، دوای بردنی بۆ نەخۆشخانە و مانەوەی لە ژێر چاودێریی پزیشكیدا، تووشی ئایدز بووە.
زەینەب تەمەنی 12 ساڵە، لە نەخۆشخانەیەكی نەجەف هێڵدراوەتەوە و دواتر پشكنینی بۆ ئەنجامدراوە و ئەنجامەكان دەریانخستووە تووشی ئایدز بووە، ئەوەش كەسوكاری تووشی سەرسووڕمان كردووە.
كەسوكاری كچەكە دەڵێن، دوای وەرگرتنی خوێن و دەرمان لە نەخۆشخانە بە چەند رۆژێك، تەندروستیی زەینەب تێكچووە و پزیشك و كارمەندەكان پشكنینی تاقیگەییان بۆ ئەنجامداوە، دەركەوتووە هەڵگری ڤایرۆسی نەهێشتنی سیستمی بەرگریی لەشە و دووچاری ئایدز بووە.
رووداوەكە كاردانەوەی لێكەوتووەتەوە، گشت ئەندامانی خانەوادەی كچەكە پشكنینیان بۆ كراوە و دەركەوتووە هیچیان هەڵگری ڤایرۆسەكە نین. كاربەدەستانی تەندروستیی شارەكەش جەختدەكەنەوە كە ئامێر و كەرەستەكانی نەخۆشخانەكەیان پشكنیوە، سەرجەمیان پاكن و دەڵێن، “زیاتر لە 1400 تووشبووی تالاسیما لە هەمان نەخۆشخانە چارەسەر دەكرێن و كەسیان تووشی ئایدز نەبوون”.
