دوای 71 ساڵ لە چوونە ئەودیو دەرگای زانكۆ و “رفاندنی دڵی”، ژنێكی ئەمریكی لە تەمەنی 91 ساڵیدا بە بڕوانامەیەكەوە لە زانكۆ دێتەدەرەوە.
جۆیس دیڤۆ ساڵی 1951 چووەتە زانكۆی باكووری ئێلینۆی و لە بواری ئابوریدا دەستی بە خوێندن كردووە، بەڵام وەك خۆی دەڵێت، “پیاوێك دڵی بردووە و دوای سێ ساڵ و نیو لە خوێندن و لە كۆتا قۆناغدا، وازی لە خوێندن هێناوە و دوای ئەڤینی دۆن فریمان كەوتووە”.
جۆیس و دۆن ساڵی 1955 هاوسەرگیرییانكردووە و سێ منداڵیان بووە، بەڵام هاوسەرەكەی مردووە و دوای پێنج ساڵ لەو رووداوە، جۆیس هاوژینیی لەگەڵ پیاوێكی دیكەدا پێكهێناوە و لەویش شەش منداڵی خستووەتەوە. ژیانێك، رۆژ بە رۆژ ئەندێشەی زیاتر لە پرۆسەی خوێندن و هەنگاوەكانی فراوانتر لە دەرگاكانی زانكۆ دوورخستووەتەوە.
تۆڕی هەواڵی “CNN” دیداری لەگەڵ ژنە خوێندكارەكەدا كردووە و بە كەناڵەكەی وتووە، “زۆر دڵتەنگبووم لەوەی خوێندنم تەواونەكردووە، منداڵەكانم هانیاندام دەستبكەمەوە بە خوێندن، بۆیە چوومەوە زانكۆی باكووری ئێلینۆی و زۆربەی وانەكانم بە ئۆنلاین دەخوێند”.
ئێستا جۆیس دیڤۆ خوێندنی تەواوكردووە و بڕوانامەی بەكەلۆریۆسی لە ئابوریدا بەدەستهێناوە، بڕیارە لەم رۆژانەدا بەشداریی ئاهەنگی دەرچوونی كۆلێژەكەی بكات و كڵاوی دەرچوون لەسەربنێت.
