بەڕێوەبەرایەتیی تەندروستیی سلێمانی وەستانی کاری ئۆتۆمبێلەکانی فریاکەوتن “ئەمبوڵانسەکان”ی راگەیاند، هۆکارەکەی کەمیی بەنزینە لە بەڕێوەبەرایەتییەکە.
سامان نادر بەڕێوەبەری فریاکەوتنی سلێمانی رایگەیاند، بۆ ماوەی سێ رۆژ کاری ئۆتۆمبێلەکانی فریاکەوتنی بەڕێوەبەرایەتیی تەندروستیی سلێمانی وەستاون بەهۆی نەبوونی سوتەمەنییەوە.
ئاماژەی بەوەکردووە، هەرسێ رۆژی (7، 8، 9) کاری ئۆتۆمبێلەکانی فریاکەوتن راگیراون، بەهۆی بەردەوامی و دووبارەبوونەوەی کێشەکانی تەندروستیی سلێمانی و لەنێویاندا کێشەی سوتەمەنی.
بەڕێوەبەری فریاکەوتنی سلێمانی دەڵێت، ئێستا بڕی 1000 لیتر بەنزینمان بۆ دابینکراوە و ئۆتۆمبێلەکانی بۆ دۆخی لەناکاو و توند کاردەکەن، ئەو بڕەش تەنها بەشی 10 رۆژ دەکات.
ئەمە لەکاتێکدایە نزیکەی دوو ساڵ دەبێت تەندروستیی سلێمانی بەهۆی کێشەی دەرمان و پێداویستیی پزیشکی و سوتەمەنییەوە دەناڵێنێت لەگەڵئەوەی چەندین جار بەڵێنی چارەسەرکردنیان پێدراوە بەڵام تا ئێستا هیج هەنگاوێکی کردەیی لەوبارەیەوە نەنراوە.
