نرخی نەوت بەرزبووەوە و دۆلار دابەزی

ئەمڕۆ نرخی نەوتی خاو بەرزبووەوە و بەهای دۆلار بەراورد بە دوێنێ دابەزی.

نەوتی خاوی برێنت 62 سەنت چووەتەسەر نرخی هەر بەرمیلێكی و ئەمڕۆ پێنجشەممە بۆ 77.80 دۆلار بەرزبووەوە. نرخی جۆری تەكساسیش 69 سەنت بەرزبووەوە و بەرمیلێكی بە 72.70 دۆلارە.

بەرزبوونەوەی نرخی نەوتی خاو، دوای ئەوە دێت لە رۆژانی رابردوودا بۆ نزمترین ئاستی ئەمساڵ دابەزی، بەڵام رێكارەكانی ئۆپیك و ئۆپیك پڵەس بۆ راگرتنی هاوسەنگی لە بەرهەمهێنان و سووككردنی رێكارەكانی دژ بە كۆرۆنا لە چین، كە یەكێكە لە گەورەترین كڕیارانی نەوت لە جیهاندا، بازاڕی نەوتیان بووژاندەوە.

پێچەوانەی نەوت، بەهای دۆلاری ئەمریكی بەراورد بە دوێنێ، ئەمڕۆ دابەزی و لەگەڵ دەستپێكردنی مامەڵەكانی بۆرسەدا 100 دۆلاری ئەمریكی بە 150 هەزار و 100 دینار مامەڵەی پێوەدەكرا، بەڵام كەمێك لەمەوبەر بەهای 100 دۆلار بۆ 150 هەزار و 350 دینار بەرزبووەوە، دوای ئەوەی دوێنێ بەهاكەی گەیشتە 150 هەزار و 750 دینار.