سەڵاحەدین بەهائەدین ئەمینداری گشتیی یەکگرتووی ئیسلامیی کوردستان، لە یادی سووتاندنی بارەگاکانی یەکگرتوو لە بادینان و كوژرانی ژمارەیەك سەركردە كادر و ئەندامی حزبەكە لە ساڵی 2005دا لە بادینان، پەیامێكی بڵاوكردەوە و دەڵێت، “6/12 یادی شەهیدانی بادینانە، دیمەنی تاڵانچی و قاتڵ و دووكەڵی بارەگا سووتانە”.
لە پەیامەكەیدا كە ئەمڕۆ سێشەممە بڵاویكردەوە، سەڵاحەدین بەهائەدین نووسیویەتی، “یادی شەهیدانی بادینانە، ڕۆژی وەفای یەکگرتووە بوێر و دلێرەکانە، خوێنی بە ناهەق ڕژاوی م. موشیری سەرکردە و م. شەفیق و م. عەبدولڕەحمان و کاکە عیسمەت نوێنەری گەنجانە، دیمەنی تاڵانچی و قاتڵ و دووکەڵی بارەگا سووتاوەکانە، قورئانی سووتاو و ئازادیی سەربڕاوە”.
ئەمینداری گشتیی یەکگرتووی ئیسلامیی کوردستان لە پەیامەكەیدا دەپرسێت: “داخۆ ناحەزان لەبیریان بێت، چونکە ئێمە بەشێک لە سەروەریمانە”.
رۆژی 2005/12/6 لە كاتی هەڵمەتی بانگەشەی هەڵبژاردنی پەرلەمانی عێراقدا، ژمارەیەك بارەگای یەكگرتوو لە دەڤەری بادینان سووتێندران و چوار ئەندامی سەركردایەتی و سێ ئەندامی تری یەكگرتوو كوژران. ئەو كات یەكگرتوو، پارتی دیموكراتی كوردستانی تۆمەتباركرد بەوەی لە پشتی رووداوەكانەوە بووە.
