نرخی نەوتی خاو بە رێژەی 2% بەرزبووەوە و دۆلار بەرامبەر بە دینار دابەزی.
ئەمڕۆ دووشەممە نرخی بەرمیلێك نەوتی برێنت 1.84 دۆلار بەرزبووەوە و بە 87.41 دۆلار مامەڵەی پێوەدەكرێت، بەوەش رێژەی 2.2٪ چووەتەسەر نرخەكەی.
نەوتی سووکی تێکساس بە رێژەی 2٪ بەرزبووەتەوە و 1.64 دۆلار چووەتەسەر نرخەكەی و بەرمیلێکی بە 81.62 دۆلار مامەڵەی پێوەدەكرێت.
هۆكاری بەرزبوونەوەی نرخی نەوت، بە جێگیری هێشتنەوەی ئاستی بەرهەمهێنانی نەوتە لەلایەن وڵاتانی ئۆپیکەوە. هاوكاتی ئەوەش زۆرێك لە شارەكانی چین رێكارەكانی بەرەنگاربوونەوەی كۆرۆنایان سووككردووە و ئەوەش خواستی لەسەر نەوتی خاو زیادكردووە، بەو پێیەی لە ماوەی رابردوودا و بەهۆی پەیڕەوكردنی سیاسەتی سفر كۆڤیدەوە، رێكاری توندی كەرەنتین گیرانەبەر.
بە پێچەوانەی نەوتی خاوەوە، ئەمڕۆ بەهای دۆلاری ئەمریكی بەرامبەر بە دیناری عێراقی پاشەكشەیكرد و 100 دۆلاری ئەمریكی بە 149 هەزار و 400 دینارە، دوای ئەوەی دوێنێ یەكشەممە 100 دۆلاری ئەمریكی 150 هەزار دیناری تێپەڕاند.
