حكومەتی عێراق، جۆر و نرخی ئەو ئۆتۆمبێلانە ئاشكرادەكات كە لە ناوخۆدا دروستدەكرێن.
دسكایب و بایك و پیجۆ، ئەو سێ جۆرەی ئۆتۆمبێلن كە كۆمپانیای گشتیی پیشەسازیی ئۆتۆمبێل لە عێراق دروستیاندەكات و تا ئێستا 120 ئۆتۆمبێل ئامادەكراون بۆ فرۆشتن و لە كۆگاكانی كۆمپانیای گشتیی پیشەسازیی ئۆتۆمبێل لە وەزارەتی پیشەسازی و كانزاكاری دانراون.
بەپێی لێدوانی ناهز ساڵحی بەڕێوەبەری كۆمپانیای دروستكردنی ئۆتۆمبێل و ئامێرەكان، عێراق سێ جۆر ئۆتۆمبێل دروستدەكات كە بریتین لە بایك، دسكایب و پیجۆ بابل.
ئەو كاربەدەستە دەڵێت، “ئۆتۆمبێلی بایك كە لە بنەڕەتدا چینییە، لە عێراق دروستدەكرێت و تایبەتمەندیی نوێ و تەكنەلۆجیای پێشكەوتوو، هەروەها مەرجی سەلامەتی و توندوتۆڵی لەخۆدەگرێت و خواستی زۆری لەسەرە”.
پێشتر خالد بەتال نەجم وەزیری پیشەسازیی عێراق رایگەیاندبوو، محەمەد شیاع سودانی سەرۆك وەزیران فەرمانیكردووە ئۆتۆمبێلی زیاتر دروستبكەن و ئەو ئۆتۆمبێلانەی كە لە عێراق دروستكراون بفرۆشرێن.
بەپێی زانیارییەكان، نرخی ئەو ئۆتۆمبێلانەی عێراق دروستیاندەكات، بەپێی جۆر و تایبەتمەندیی ئۆتۆمبێلەكان دەبێت و لە نێوان پێنج بۆ 12 هەزار دۆلاردا دەبێت.
