میوەی هەنار یەکێکە لە بەسوودترین میوەکان کە ناتوانرێت پشتگوێبخرێت بۆ تەندروستیی جەستە، بەهۆی دەوڵەمەندیی میوەکە بە ڤیتامینەکان و کانزا و دژە ئۆکسانەکان.
هەنار دەوڵەمەندە بە پێکهاتەی دژەهەوکردن و ڤیتامین سی کە بەرهەمهێنانی دژەتەنەکان زیاتردەکات و یارمەتیدەرە لە بەهێزکردنی بەرگریی لەش، بەمەش هەنار دەتوانێت یارمەتیدەربێت لە پاراستنی سیستمی بەرگریی و ڕێگری لە نەخۆشییە باوەکان و هەوکردنەکان.
پۆتاسیۆم و دژە ئۆکسێنەرەکانی ناو هەنار کاریگەریی هەیە لەسەر پارێزگاریکردن لە نەخۆشییەکانی گورچیلە و هەوکردنەکانی پەیوەست بە شۆردنی گورچیلەکان.
گرنگترین سوودەکانی هەنار:
یەکەم: پارێزگاریکردن لە تەندروستیی دەم و ددان، هەنار بۆ تەندروستیی دەم و ددان بەسوودە، توێژینەوەکان دەڵێن پارێزگاری لە پووک دەکات و ڕێگریی لە هەوکردنی دەکات.
بەکارهێنانی هەویرێکی ددان شتن کە هەنار لە پێكهاتەکەیدابێت بۆ ماوەی چوار هەفتە نەخۆشییەکانی دەم و ددان کەمدەکاتەوە، هەروەها کلۆربوونی ددان ڕادەگرێت.
دووەم: پاراستنی تەندروستیی دڵ، هەنار رۆڵی هەیە لە دابەزاندنی کۆلیستۆڵ و ڕێگری لە ئۆکسانی دەکات، بەوەش دڵ لە گیران و رەقبوونی خوێنبەرەکانی دەپارێزێت.
سێیەم: رێگری لە شێرپەنجە، هەنار دەوڵەمەندە بە دژە ئۆکسێنەرەکان کە بەرگریی لەش بەهێزدەکات و ڕێگری لە گەشەی خانە شێرپەنجەییەکان دەگرێت، چەندین توێژینەوە سوودی زۆری هەناریان بۆ پارێزگاریی پیاوان لە شێرپەنجەی پرۆستات پشتراستکردووەتەوە.
چوارەم: پارێزگاری لە کەمخوێنی، بوونی زۆری ئاسن لە هەناردا هۆکارە بۆ ڕێگریکردن لە تووشبوون بە کەمخوێنی.
پێنجەم: هەنار بەسوودە بۆ درەوشانەوەی پێست، بەشداریی زۆری هەیە لە دروستکردنی بابەتەکانی جوانکاریدا.
