بەڕێوەبەرایەتیی گشتیی تەندروستیی سلێمانی رایدەگەیەنێت، لە ماوەی مانگی ڕابردوودا 981 منداڵ لە نەخۆشخانەی منداڵبوونی فریاكەوتنی فێركاری لەدایكبوون كە 528 منداڵیان كوڕبوون و 453 منداڵیان كچ بوون.
بەپێی راگەیەندراوێكی بەڕێوەبەرایەتیی گشتیی تەندروستیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ماوەی مانگی ڕابردوودا لە نەخۆشخانەی منداڵبوونی فریاكەوتنی فێركاری پێنج هەزار و 415 نەخۆش سەردانیان كردووە و لەو ژمارەیەش هەزار و 730 نەخۆش داخڵكراون و چارەسەری پێویستیان بۆ كراوە.
لە راگەیەندراوەكەدا هاتووە، هەر لە ماوەی مانگی ڕابردوودا 981 منداڵ لە نەخۆشخانەی منداڵبوونی فریاكەوتنی فێركاری لەدایكبوون و 528 منداڵیان كوڕ بوون و 453 منداڵیان كچ بوون كە 539 منداڵیان بەشێوەی سروشتی لەدایكبوون و ئەوانی دیكە لەڕێگەی نەشتەرگەرییەوە لەدایكبوون.
ئاماژە بۆ ئەوەش كراوە، لە مانگی رابردوودا لە نەخۆشخانەی منداڵبوونی فریاكەوتنی فێركاری 650 منداڵ لەبەشی نەبەكام داخڵكراون و 22 حاڵەتی لەدایكبوونی دوانە چوار حاڵەتی لەدایكبوونی سیانە 59 لەبارچوون هەبوون و هەزار و 239 سۆنەریش گیراون.
