وەزارەتی پەروەردەی هەرێم کاتی تاقیکردنەوەی زمانی کوردی خوێندنگە ناحکومییەکان بۆ قۆناغی پێنجەم ئاشکراکرد و رایگەیاند، تاقیکردنەوەکە تەنها بۆ دیاریکردنی ئاستی خوێندکارانە لە زمانی کوردیدا.
بە پێی نوسراوێکی وەزارەتی پەروەردەی هەرێم کە وێنەیەکی دەست تۆڕی میدیایی ئێستا کەوتووە، ” رێکەوتی 3-4-2023 تاقیکردنەوەی زمانی کوردی قۆناغی پێنجەمی خوێندنگە ناحکومییەکان بەڕێوەدەچێت و کە ماوەی 2:20 خولەک کات دەدرێت بە خوێندکاران بۆ وەڵامدانەوە”.
ئاماژەی بەوەش کردووە، “ئەم تاقیکردنەوەیە بە مانای دەرچوون و دەرنەچوونی خوێندکاران نییە، بەڵکو بۆ دیاریکردنی ئاستیانە لە زمانی کوردیدا و زانینی ئاستی گرنگیدانی ئەو خوێندنگانەیە بە زمانی کوردی”.
ئاشکرای کرد، “پێویستە ناوی سەرجەم خوێندکارانی بەشداربوو لە تاقیکردنەوەکەدا لە سیستەمی ئی پەروەردە تۆماربکرێت بە پێچەوانەوە بەڕێوەبەری خوێندنگاکان بەرپرسیار دەبن”.
