بافڵ جەلال تاڵەبانی، سەرۆكی یەكێتیی نیشتمانیی كوردستان و فایەق زێدان، سەرۆكی ئەنجومەنی باڵای دادوەریی عێراق لە بەغداد كۆبوونەوە.
لە كۆبوونەوەكەدا چارەسەركردنی كێشەكانی نێوان هەرێم و بەغداد لەسەر بنەمای دەستوور و یاسا بەركارەكان دووپاتكرایەوە بە شێوەیەك كە ماف و بەرژەوەندیی هەموولایەك پارێزراوبێت.
هەر لە كۆبوونەوەكەدا جەخت لە پاراستنی سەربەخۆیی دەسەڵاتی دادوەری، تێكەڵنەكردنی پرسە سیاسییەكان بە كەیسە یاساییەكان كرایەوە و هەماهەنگی زیاتری نێوان دادگاكانی ھەرێم و عێراق بۆ جێبەجێكردنی بڕیارەكانی دادگا و چەسپاندنی یاسا لە وڵاتدا بە گرنگ وەسفكرا.
سەرۆك بافڵ جەلال تاڵەبانی پێزانینی بۆ ڕۆڵی ئەرێنیی ئەنجومەنی باڵای دادوەری دەربڕی كە پارێزەری مافی عێراقییەكان بوون. داواشیكرد پشتیوانیی مافە دەستووری و یاساییەكانی گەلی كوردبن و ڕۆڵی یاسایی خۆیان بگێڕن لە چارەسەركردنی كێشەكانی نێوان هەرێم و بەغداد.
