مامۆستا و فەرمانبەران لە سلێمانی و هەڵەبجە گردبوونەوەیان ئەنجامدا و داوای گەڕاندنەوەی پلەبەرزكردنەوە دەكەن.
لە بەردەم پەروەردەی رۆژئاوا لە سلێمانی و باخی گشتی لە هەڵەبجە، ژمارەیەك لە مامۆستا و فەرمانبەرانی فەرمانگە جیاجیاكان گردبوونەوەی ناڕەزاییان ئەنجامدا.
خۆپیشاندەران یاداشتێكیان خوێندەوە و تیایدا سەرەڕای ناڕەزایی نیشاندان بەرامبەر راگرتنی پلەبەرزكردنەوە، هۆشداریشیاندا لەو پێشنیارەی لەلایەن ئەنجومەنی گشتیی راژەوە سەبارەت بە پلەبەرزكردنەوەی مەرجدار خراوەتەڕوو.
لە یاداشتەكەدا كە ئاراستەی سەرۆكایەتییەكانی (هەرێم، ئەنجومەنی وەزیران و پەرلەمان)ی كوردستان كراوە هاتووە، بەو جۆرە نایەكسانییەی لەنێوان مووچەخۆران دروستكراوە، هێندەی دیكە گیانی نیشتیمانپەروەری لەناو خەڵكدا دەكوژن و بارودۆخی دەروونی خەڵك نائارامتر دەكەن.
داواشیانكرد، بڕیاری گەڕاندنەوەی پلەبەرزكردنەوە بۆ كۆی مووچەخۆران وەك یەك بدرێت و لە بودجەی ساڵی 2023دا جێگیربكرێت.
