سەرۆکی حکومەتی هەرێمی کوردستان هۆشداریی لە دووبارەبوونەوەی تەقینەوەی تانکیی غاز دەدات و بە مەترسییەکی جددی ناویدەبات، ڕایگەیاندووەە، “دەبێت چاودێری و ڕێکاری باشتر لەوبارەیەوە بگیرێتەبەر”.
مەسرور بارزانی سەرۆکی حکومەتی هەرێمی کوردستان رایگەیاندووە، “هیوای سەلامەتی بۆ خانەوادە و کەسوکاری قوربانییەکان دەخوازین، ئەو ڕووداوە دڵتەزێنەی دهۆک مایەی خەمێکی قووڵە، دڵمان لەگەڵتانە و هاوبەشی خەمتانین”.
مەسرور بارزانی ئامادەیی بۆ هەر پێداویستی و هاوکارییەکی خانەوادەی قوربانییەکان و چارەسەرکردنی بریندارەکان پیشانداوە.
سەبارەت بە بەکارهێنانی سیستمی غاز مەسرور بارزانی رایگەیاندووە، دووبارەبوونەوەی تەقینەوەی غاز مایەی نیگەرانی و مەترسییەکی جددییە، دەبێت لایەنی پەیوەندیدار بە زووترین کات بە جددی لەسەر ئەم بابەتە بوەستن.
ئاماژەی بەوەشکردووە، دەبێت چاودێرییەکی باشتر و ڕێکاری باشتر بۆ چۆنێتیی بەکارهێنانی غاز و سەلامەتی بگرنەبەر بۆئەوەی ڕووداوی دڵتەزێنی لەمجۆرە دووبارە نەبێتەوە.
ئەمە لەکاتێکدایە پێشتر ئومێد خۆشناو پارێزگاری هەولێر ڕایگەیاند، کە مەسرور بارزانی لە پەیوەندییەکی تەلەفۆنیدا بڕیاریداوە کارکردن بە سیستمی غاز بەهەموو شێوەیەک رابگیرێت.
