بافڵ جەلال تاڵەبانی سەرۆکی یەکێتیی نیشتمانیی کوردستان لە بەغداد لەگەڵ ماتیۆ مەکفارلان فەرماندەی گشتیی هێزەکانی هاوپەیمانان کۆبووە و میکانیزمی هەماهەنگی و هاوکارییەکانی نێوان هێزەکانی پێشمەرگە، سوپای عیراق و هێزەکانی هاوپەیمانان گفتوگۆی لەبارەوەکرا.
لە کۆبوونەوەکەدا دوایین پێشهات و گۆڕانکارییەکان تاوتوێکران و هەنگاوەکانی رووبەڕووبوونەوەی تیرۆر و هاوکاری و هەماهەنگیی نێوان هێزی پێشمەرگە، سوپای عیراق و هێزەکانی هاوپەیمانان گفتوگۆیان لەبارەوەکرا.
جەخت لە سەرخستنی پرۆسەی رێکخستنەوە و یەکخستنەوەی هێزەکانی پێشمەرگە لەسەر بنەمای مەشق و راهێنانی نوێ و پێکهێنانی هێزێکی پێشکەوتووی تۆکمە کرایەوە.
سەرۆک بافڵ جەلال تاڵەبانی ئاماژەی بە دوایین گۆڕانکارییەکانی ناو هێزی پێشمەرگە و سەرخستنی ئەو هەنگاوە نیشتمانییە کرد و رایگەیاند، هەوڵەکان بۆ رێکخستنەوەی هێزی پێشمەرگە بەردەوامە و لەو چوارچێوەیەشدا چەند لیوا و یەکەیەکی سەربازی لە مەشقی چڕ و بەردەوامدان.
داواشی لە هێزەکانی هاوپەیمانان کرد لە هاوکارییەکانیان بۆ هێزی پێشمەرگە بەردەوامبن لەپێناو زیاتر بەرەوپێشچوونی توانا سەربازی و تەکنیکییەکانی هێزەکە.
لە کۆبوونەوەکەدا میکانیزمی هەماهەنگی و هاوکارییەکانی نێوان هێزەکانی پێشمەرگە، سوپای عیراق و هێزەکانی هاوپەیمانان گفتوگۆی لەبارەوەکرا و داواکرا هەموولایەک هاوکاری یەکتربن بەتایبەت لەو ناوچانەی بۆشایی ئەمنی تێدایە لەپێناو پاراستنی ئارامی و ئاسایش لە وڵاتدا.
