بافڵ جەلال تاڵەبانی سەرۆکی یەکێتیی نیشتمانیی کوردستان جەختدەكاتەوە، “دەبێت رێڕەوی چەوتی حوكمڕانی راستبکرێتەوە و حکومەت حکومەتی ھەموو خەڵک و شار و شارۆچکەکان بێت”.
بافڵ جەلال تاڵەبانی، سەرۆکی یەکێتیی نیشتمانیی کوردستان لە ھۆڵی شەھید شیھاب لە قەڵاچوالان لەگەڵ کادران و ئەندامانی سنووری مەڵبەندەکانی سلێمانی و گەرمیان کۆبووەوە.
لە کۆبوونەوەکەدا كە رەفعەت عەبدوڵا، بڕیاردەری دەستەی کارگێڕی، شاناز ئیبراھیم ئەحمەد، کارگێڕی مەکتەبی سیاسی، سەرکەوت زەکی، لێپرسراوی مەکتەبی رێکخستن، جەزا سەید مەجید، لێپرسراوی مەڵبەندی رێکخستنی سلێمانی و میقداد شێخ بەھادین، لێپرسراوی مەڵبەندی رێکخستنی گەرمیان ئامادەبوون، سەرۆک بافڵ جەلال تاڵەبانی وتارێکی ھەمەلایەنەی لەبارەی دۆخی گشتیی ھەرێم، عێراق، ناوچەکە و یەکێتی پێشکەشکرد. ئاماژەی بە ھەوڵ و ھەنگاوەکانی یەکێتی کرد کە سەرباری ئاستەنگ و بەربەستەکان توانیویەتی سەرکەوتنی گەورە بەدەستبھێنێت لە پرۆسەی سیاسیی عێراقدا. هەروەها توانی ئیستحقاقی سەرۆک کۆمار ھەر لای کورد و یەکێتی بھێڵێتەوە و سیاسەتێک ئاراستە بکات کە ببێتە مایەی بەھێزترکردنی پێگەی کورد. وتیشی، “بڕیارمانداوە لەمەودوا ئامادەیی زیاترمان لە بەغداد ھەبێت وەک سەنگەری پێشەوەی داکۆکیکردن لە خەباتی دیموکراسی و نەتەوەیی گەلەکەمان”.
لە بارەی ھەرێمی کوردستان و پێشھاتە سیاسییەکان، سەرۆکی یەکێتیی نیشتمانیی کوردستان ھەڤاڵانی لە گۆڕانکارییەکان بەرچاوڕوونكرد و رایگەیاند، یەکێتی ھەمیشە لە چوارچێوەی سیاسەتی حەکیمانەی سەرۆک مام جەلال ستراتیژی خۆی ئاراستەکردووە و دەکات. لە بەرامبەر ھەموو ئەگەرەکاندا پەنای بۆ دیالۆگ و چەپکەگوڵەکە بردووە، بەڵام بەداخەوە ئەم ویستە نیشتمانییەی ئێمە بەھەند وەرنەگیرا و پشوودرێژیمان لەبارەی تاکڕەویی حوكمڕانی، جیاکاری لە ئیدارەدان و دابەشکردنی داھاتی ئەم ھەرێمە کۆتایی ھات. هەر بۆیە بڕیارماندا ستۆپ بە پاوانخوازی بکەین و چیتر قبووڵی نەکەین دۆخەكە بەم شێوەیە بەردەوام بێت، چونکە دەبێت رێڕەوی چەوتی حوكمڕانی راستبکرێتەوە و حکومەت حکومەتی ھەموو خەڵک و شار و شارۆچکەکان بێت. بۆ ئەم مەبەستەش لەگەڵ دڵسۆزانی گەلەکەمان ئەم ئامانجە باڵایە بەدیدەهێنین.
لە بەشێکی تری کۆبوونەوەکەدا سەرۆک بافڵ سەبارەت بە ئەرک، خەبات و تێکۆشانی ئەمڕۆی هەڤاڵانی ڕێکخستنەکانی یەکێتی ھەڵوەستەیکرد و ئاماژەی بۆ ئەوە کرد، یەکێتی وەک ھێزێکی جەماوەریی ھەمەلایەنە ھەمیشە باوەڕی بە نوێبوونەوە و خۆڕێکخستنەوە ھەبووە لەسەر بنەمای ھەڤاڵێتی، یەکێتیبوون و یەکێتیی ناو یەکێتی، بۆ ئەوەش ھەنگاوی باشمان ناوە و ئەگەر لە شوێنێکدا کەموکوڕی ھەبووبێت، بێگومان چارەسەری دەکەین و دەیکەینە بنەمای جۆشدانەوەی کاری رێکخراوەییمان. بۆیە ھەر کادر و ئەندامێکی یەکێتی تێبینی یاخود رەخنەیەكی ھەبێت، پێشوازی لێدەکەین بەڵام نابێت گلەییەکان ببنە ھۆكاری ساردبوونەوە و دوورکەتنەوەمان، چونکە یەکێتییەکەی مام ھی خەڵک و ھەڤاڵەکانێتی و ئێمە بە ئێوە و دڵسۆزیتانەوە دەتوانین گەشە بە خۆمان بدەین و کاروبارەکان باشتر رێکبخەینەوە. بۆ ئەوەش سەرۆکی یەکێتیی نیشتمانیی کوردستان داوای لە ئامادەبووان کرد بە گیانێكی هەڤاڵانە و ورەیەكی پۆڵایینی یەكێتییانەوە درێژە بە خەباتی خۆیان بدەن و هاوكار و ھەماھەنگی یەکتربن بۆ بەهێزتركردن و پێشخستنی ریزەکانی یەکێتی.
لە کۆتایی کۆبوونەوەکەشدا گفتوگۆیەکی کراوە بەرێوەچوو و سەرۆک بافڵ ھەڤاڵانی راسپارد بچنەوە ناو ھاوڵاتییان و ئۆرگانەکانی یەکێتی بکەنەوە بە ماڵی كۆمەڵانی خەڵک و وتی، “دەبێت کادری یەکێتی لەبەرەی پێشەوەی داکۆکیکردن بێت لە مافەکانی هاوڵاتییان و بە رۆحێكی یەكێتییانەوە درێژە بە خەبات بدەن و لە ئاست بەرپرسیارێتیی قۆناغەکەدا بن”.
