سەرۆكی شارەوانیی سلێمانی ئاشكرایكرد، زەوی بۆ دروستكردنی یەكەی نیشتەجێبوون بۆ كرێنشینان دیاریكراوە و دەڵێت، دوای هەڵمەتەكەی بافڵ جەلال تاڵەبانی سەرۆكی ی. ن. ك بۆ كۆتاییهێنان بە داگیركردنی زەوی و موڵكی گشتی، دیاردەكە بەرەو نەمان دەڕوات.
لەیلا عومەر سەرۆكی شارەوانیی سلێمانی رایگەیاند، لە سلێمانی زەوی بۆ دروستكردنی یەكەی نیشتەجێبوون بۆ كرێنشینان دیاریكراوە و هەشت هەزار یەكە لە پارێزگای سلێمانی دروستدەكرێن، لەو ژمارەیە دوو هەزار یەكەی نیشتەجێبوون لەناو شاری سلێمانی دەبن و لە تانجەرۆ و تاسڵوجە زەوییان بۆ دیاریكراوە.
سەرۆكی شارەوانیی سلێمانی جەختیكردەوە لەوەی سەرگەرمی تەواوكردنی رێكارەكانن و نەخشەدانان بۆ پڕۆژەكە تەواوبووە و لە ماوەی داهاتوودا رایدەگەیەنن و وتی، “زۆربەی زەوییەكان موڵكی هاوڵاتییانن و كوژاندنەوەیان و كردنیان بە موڵكی شارەوانی و تەواوكردنی رێكارەكان كات دەخایەنێت”.
لەبارەی دیاردەی زەوتكردنی زەوی و موڵكی گشتییەوە، لەیلا عومەر ئاشكرایكرد، داگیركردنی زەوی لە لایەن بەرپرسان و كەسانی سەربازی و ئەمنییەوە، تا رادەی نەمان كەمبووەتەوە و هۆكارەكەی گەڕاندەوە بۆ ئەو هەڵمەتەی لە ماوەی رابردوودا بە فەرمانی بافڵ جەلال تاڵەبانی سەرۆكی یەكێتیی نیشتمانیی كوردستان، بەرپاكرا بۆ دەستگیركردنی ئەو بەرپرس و كەسانەی دەستیان لە داگیركردنی زەوی و موڵكی گشتیدا هەبووە.
