سەرایا سەلام باڵی سەربازیی رەوتی سەدر، پێنج كەسی لە ریزەكانی دەركرد و هۆكاری بڕیارەكە دەگەڕێنێتەوە بۆ “ناڕێكیی رەفتاریان”.
لە راگەیەندراوێكدا كە بەرپرسی گشتیی سەرایا سەلام واژووی كردووە و ئەمڕۆ شەممە بڵاوكراوەتەوە، بڕیاری دەركردنی پێنج ئەندامی گرووپە چەكدارەكەی سەر بە رەوتی سەدر ئاشكراكراوە كە چواریان لە بەغدادن و پێنجەمیان لە پارێزگای بابلە.
راگەیەندراوەكەی نووسینگەی بەرپرسی گشتیی سەرایا سەلام ئاماژەی بۆ ئەوە كردووە كە هۆكاری دەركردنی ئەو پێنج ئەندامەیان، “رەفتاری ناڕێكیانە” و هەموو ئەندامەكانی سەرایا سەلامی ئاگاداركردووەتەوە بایكۆتیان بكەن و بە هیچ جۆرێك مامەڵەیان لەگەڵدا نەكەن.
دەشڵێت، ئامانج لە دەركردنی بڕیارەكە، “پاراستنی بەرژەوەندیی گشتی و پارێزگاریكردنە لە ناوبانگی دامەزراوە سەربازییەكە” بەو پێیەی ئەو پێنج كەسە “سەرپێچیی كارگێڕییان كردووە و رەفتاریان ناڕێك بووە”.
