وەزیری دارایی هەرێم لەگەڵ لێپرسراوانی ئیداری لە پارێزگای سلێمانی كۆبووەوە و جەختی لە ھاوكاری و ھەماھەنگیی پێویست لەپێناو چارەسەركردنی گرفتەكان كردەوە.
بەپێی ڕاگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئاوات جەناب نوری لەگەڵ بەڕێوەبەری گشتیی تەندروستی و بەڕێوەبەری گەنجینەی یەكی سلێمانی و سەرپەرشتیاری كۆمەڵگای دەروازەی نێودەوڵەتیی پەروێزخان و سەرۆكی ژووری بازرگانی و پیشەسازی كۆبووەوە.
لە ڕاگەیەندراوەكەدا هاتووە، لە كۆبوونەوەكەدا بەدواداچوون بەدواداچوون بۆ گرفت و لەمپەرەكانی بەردەم كەرتی تەندروستی و ھاوڵاتییان و بازرگان و كاسبكارانی ناوبازار كراوە.
ئاماژە بۆ ئەوەش كراوە، كۆبوونەوەكەی وەزیری دارایی لەگەڵ بەرپرسی یەكەی تەندروستی تایبەت بوو بەو گرفت و ئاستەنگانەی ڕووبەڕووی ئەو سێكتەرە بووەتەوە و ئامادەیی خۆشی نیشاندا بۆ ھاوكاری و ھەماھەنگی پێویست لەپێناو چارەسەركردنی گرفتەكان و پێشكەشكردنی خزمەتگوزارییە گشتییەكان لە نەخۆشخانە و ناوەندە تەندروستییەكانی سنووری پارێزگاكە بە ئاراستەی خزمەتكردنی ھاوڵاتییان بە گشتی.
بەشێكی دیكەی كۆبوونەوەكە كە بە ئامادەبوونی بەڕێوەبەری گشتیی بانكی ھەرێم/ سلێمانی و سەرۆكی ژووری بازرگانی و پیشەسازی و ژمارەیەك بازرگان بەڕێوەچوو، وەزیری دارایی و ئابوری هاوشێوەی كۆبوونەوەكانی پێشوتر جەختیكردەوە ھەماھەنگ و ھۆكاردەبن بۆ ڕەخساندنی پانتایی زیاتری بازرگانی و نەھێشتنی ڕۆتین بە ئاراستەی چارەسەركردنی ئەو كێشە و لەمپەرانەی بوونەتە ئاستەنگ و بار بەسەرشانی ھاوڵاتییان بە گشتی و بازرگانان و خاوەن پیشەكانی ناو بازاڕەكان.
