یانەی ئەتلەتیکۆ مەدرید ئامادەکاری کردووە بۆ ئەگەرەکانی وازهێنان، یاخود دوورخستنەوەی دیێگۆ سیمیۆنی.
بەپێی زانیاریی ڕۆژنامەنووسانی ئیسپانیا لە پرۆگرامی “ئیل شێرینگیتۆ”، خراپبوونی ئاست و ئەنجامەکانی ئەتلەتیکۆ مەدرید لە خولی ئیسپانیا، هەروەها شکستهێنانیان لە خولی یانە پاڵەوانەکانی ئەوروپا، ئیدارەی یانەی دووەمی مەدریدی ناچارکردووە بیر لە دوورخستنەوەی دیێگۆ سیمیۆنی ڕاهێنەر بکەنەوە.
بۆ ئەو مەبەستەش دانوستاندنیان لەگەڵ لێپرسراوی کارەکانی لویس ئێنریکی، ڕاهێنەری هەڵبژاردەی ئیسپانیا و پێشووی بەرشلۆنە دەستپێکردووە.
بەڕێوەبەرانی ئەتلەتی هەوڵدەدەن دوای چالاکییەکانی مۆندیال دانوستاندن لەگەڵ ئێنریکی چڕتر بکەنەوە، پلانیشیان ئەوەیە لە کۆتایی ئەم وەرزە، یاخود وەرزی دواتر گۆڕانکاری لە پێگەی ڕاهێنەردا بکەن.
